RSS

இரயில் பயணம்- இனியொரு கனவா?

03 Dec

கடலலைகள் பாடும்
இரயிலடியின் காற்றினிசையில்
நினைவலைகளின் நாடாக்களை
நித்தம் சுழற்றும் எல்லாரும்

மீண்டும் வராதா அக்காலம்
மீண்டு வராதா இரயில் கோலம்
வேண்டுகின்றோம் வேதனையில்
தூண்டுகின்றோம் தொடர்ந்து….

அந்தக் காலம்:

பாங்கோசையுடன் வழியனுப்பும்
பாங்கினைக் கண்டோம்
ஹஜ்ஜுப் பயணிகளாய்
பாவங்கழுவி வருவோரை
ஆரத்தழுவி “துஆ” வேண்டுவோம்

ஃபஜரின் பாங்கோசை
படுக்கையை விட்டெழுப்பும்;
பஞ்சாயத் போர்டு சங்கொலி
பள்ளிக்கு ஓத அனுப்பும்;
புகைவண்டியின் வருகையோசை
புறப்படவைக்கும் பள்ளிக்கூடம்

தேர்வுக்குத் தயாராக
தேர்ந்தெடுக்கும் இரயிலடியும்;
மனப்பாடம் செய்யும் ஒலியலைகள்
வனப்போடுச் சுற்றி வரும்
உப்பளத்தின் முகடும்;
இப்பொழுதும் என் நினைவலையில்…

மனப்பயிற்சி, மூச்சுப்பயிற்சி
கடற்காற்றினைக் கலப்பின்றி
உடலுக்குள் உள்வாங்கும்
நடைப்பயிற்சியும் நாளும்….

அத்துணைச் சுகமான
அந்த இரயிலடி எங்கே?
இத்துணை வருடமாய்
“இத்தா”வில் இருப்பதால்
அந்த கருப்பு தேவதை
எந்த நாளில் இனியும்
மணக்கோலம் காண்பாள்?

வயதானோர்க்கு வசதியான
பயணமும் வாராதா?
இடியாப்பம் இறைச்சி
மடியில் வைத்து உண்ண;
இடித்துக் கொள்ளாத
இருக்கையும்;
படித்துக் கொண்டே
பயணிக்க படுக்கையும்;
ஒளுவும்; தொழுகையும்
ஒழுங்காய் நிறைவேற்றவும்;
தாலாட்டுப் பாடலாய்
“தட தட தட “ ஓசையும்
குறைவான செலவில்
குடும்பமே பயணிக்கவும்
நிறைவேறுமா ஆசையும்???

இக்காலத்தில்
கடலும் மறந்து போச்சு;உப்பளத்
திடலும் மறந்து போச்சு
உடலும் பெருத்துப் போச்சு
உடலுக்கு நடைப்பயிற்சியும் என்னாச்சு?
”இரயிலடி என்றால் என்ன?”
இனிவரும் சந்ததிகளின் அறியாமையாச்சு

அஃதொரு கனாக்காலம்!!

இரவின் முழுத் தூக்கமும்
இரயிலின் நீண்ட ஓட்டத்தில்
ஃபஜ்ரின் நேரத்தில்
பளிச்சென கதிரவன் உதயத்தில்
படுக்கையை விட்டெழுந்தால்
அதிராம்பட்டினம் இரயில் நிலையம்
அதிர்ந்திடும் எண்ண ஓட்டம்
அதிரையில் நிற்கும் இரயிலின் ஓட்டம்
குதிரை வண்டியில் குதூகலமாய்
வீட்டை நோக்கியே ஓடும் மனமும்
தேட்டமாய்ப் பார்க்கின்றேன்
எங்கோப் போனது இரயில் பயணம்?

அதிரைக்கு அப்பால்
அக்கரையில் உள்ளோம்
அதிரையின்பால்
அக்கறையில் உள்ளோம்


”கவியன்பன்” கலாம், அதிராம்பட்டினம்(பிறப்பிடம்)
அபுதபி(இருப்பிடம்)
எனது வலைப்பூத் தோட்டம் http://www.kalaamkathir.blogspot.com
Advertisements
 

Tags:

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: